政情：公民講場：脫戒似婚變 難分真與假

爆出換樓醜聞嘅民政事務局常任秘書長馮程淑儀，雖然連日避開追訪，但直至其丈夫馮永業被揭與賭王姨仔陳婉玉關係非比尋常後，前日終於申請休假，鼻紅紅咁拖埋行李離開跑馬地成和坊呢個佢聲稱喺唔知情下同陳婉玉交換得來嘅愛巢，仲除埋婚後多年來一直陪伴在身嘅無名指婚戒，令婚變傳聞甚囂塵上。不過，經典電影《賭神》都有教落，賭神高進為咗報仇故意設局，喺賭局加上摸玉戒指呢個小動作扮「偷雞」，最終搞到仇家要喺赤柱監獄擺壽酒。究竟馮程淑儀高調除婚戒示眾呢一招，究竟係真婚變，抑或係同丈夫「扯貓尾」營造自己係受害者角色，對換樓交易唔知情以劃清界線，咁就真係佢自己先知喇！