政情：團長容海恩 傳授創業秘笈
本身係青專網主席嘅新民黨靚大狀容海恩（Eunice）一向百足咁多爪，喺剛過去嘅復活節，佢就帶同八十名年輕人去杭州考察，嚟緊又會舉辦創業比賽，協助年輕人一圓創業夢。讀電腦科學出身嘅Eunice，雖然暫時未有一盤完全屬於自己嘅生意，但過往不時同朋友一齊創業，佢嘅經驗係，香港年輕人創業最大嘅阻力就係無推動力，通常諗諗下就無咗件事，或構思被人用咗。
義務法律諮詢「生意」唔錯
講番帶團考察，其實Eunice以往已經做過好多次團長，包括帶團去華南城、前海等。佢認為做團長最緊要係多啲同團友溝通，問到今次帶咁多年輕人出團會否有gap（代溝），佢笑言一啲問題都無，仲話好多團友詢問關於法律嘅問題，包括中港兩地點搞生意、點睇住生意盤數等。至於佢一直做開嘅義務法律諮詢服務，目前「生意」都唔錯，平均每日有兩至四個電話，反應好之餘，仲無人玩電話整蠱佢添。