近年社會愈趨激進，連早前社會工作者註冊局選舉都有比較激進嘅社工復興運動成員當選，而教協最近改選理事會及監事會，亦都同樣面對激進勢力嘅挑戰，但結果就有所不同喇。教協改選結果尋日出爐，由全體七萬八千多名會員投票選出一六至一八年度理事會及監事會，一如所料，由現任會長馮偉華所領導嘅內閣順利當選，更加獲得超過九成嘅信任票。
不過，監事會競爭就激烈得多喇，由三十八位候選人選出十九名監事席位，現任副會長張文光更由理事會轉戰監事會戰團，與較為激進、以韓連山為首嘅進步教師聯盟硬碰。雖然韓連山成功晉身監事會，但只得三成六選票，反觀張文光就有六成七票高票當選，得票大幅拋離韓連山，睇嚟教協入面嘅激進勢力仍然未成氣候。