中環出更：扮揪得 吳秋北否認戰立會
工聯會（工記）理事長吳秋北早前為宣傳五一大遊行，明抄電影《葉問》已故詠春大師葉問造型，拍攝多張硬照扮「揪得」，同爭取勞工權益似乎大纜都扯唔埋，原來有後續。吳秋北前晚喺社交網站上載五一大遊行首輪宣傳片，飾演詠春師傅嘅吳秋北遇着有學生報名學詠春，點知呢個打工仔有返工冇收工，要夜晚九點半先趕得切上堂。
吳秋北就忍唔住扯火話：「九點半我都收工啦！」藉宣傳片控訴香港打工仔工時係全球之冠，呼籲五一上街爭取標準工時。佢突然咁落力，唔通想參選？
「宗師」硬照宣傳遊行
吳秋北前日出席活動時笑言無意提早立法會「選戰」，只係幫工會兄弟亮相宣傳遊行，搵師父教兩招做吓樣，本身唔識詠春，名副其實扮「揪得」，仲話如果真係想參選，宣傳硬照就唔會影到佢咁暗啦！
不過，據知宣傳片中嘅打工仔都係工記職員，幫手拍片都唔好要人哋無償加班至得喎。
卓妮