中環出更：驚寵壞孖女 曾裕唔做「直升機」
近期有調查指香港兒童嘅快樂指數愈來愈低，卓妮日前喺香港新界地區事務顧問協會周年晚宴上，同「美容天后」身心美慈善基金創會主席曾裕（Joyce）傾開呢個話題。好耐冇見嘅Joyce同丈夫李守義（Francis）拍拖現身，佢哋啱啱生咗一對孖女，依家八個月大，Joyce話，小朋友唔開心多數係因為被大人照顧得太周到，包括接送返學，結果讀到中學都仲未識搭車，又點應付逆境呢？
Joyce年逾五十仲咁辛苦追BB，皆因佢哋一直想生但唔成功，今次喜獲孖女直言係天賜。Francis就笑笑口話，原本想追個囝，但依家追到兩個囡都一樣咁開心。Joyce話，今時今日小朋友唔開心多數係因為被「直升機家長」寵壞，家長經常擔心佢哋做唔到嘢，所以乜都幫手做埋。佢唔想寵壞孖女，日後可能要訓練佢哋自己返學喎！
彭濼錡籌備支援跨境童
同場嘅新界社團聯會理事長陳勇就話，做自己喜歡嘅事就自然開心，好似佢細個好鍾意睇武俠小說，不眠不休追睇都唔覺辛苦，結果睇到發燒添！卓妮仲見到前屯門區議員林德亮、港區婦聯代表聯誼會會長葉順興及身心美基金籌募委員會副主席彭濼錡（Cory）。
Cory話，位於深圳南山嘅「身心美跨境服務之家」將於四月中旬開幕，到時將為數以萬計嘅跨境兒童及其家人提供支援。葉順興就籌備緊一項全由婦女參與嘅千人「椅上操」，希望改寫健力士紀錄。
卓妮