俗語話，窮則變，變則通。本港旅遊業陷入寒冬，想唔求變都唔得，業界尋日發表《香港遊客經濟發展藍圖》，希望提升競爭力自救，出發點係好嘅，但究竟行唔行得通，就好難講咯。
呢份藍圖由酒店業主聯會同理工大學聯合制訂，提出五大發展方向，包括建設智慧旅遊系統、成立由特首直接領導嘅旅遊政策局、拓展「機場城市/大嶼山」經濟，以及推廣「友好香港」，喺各區鼓勵遊客同居民互動等。
即係咁，與其坐以待斃，不如主動出擊。旅遊業無以為繼，衰過沙士時期，業界提出發展藍圖救亡，唔止其志可嘉，更加係應有之義添，如果五大發展方向能夠付諸實行，不失為一條自救之道(口架)。問題係，發展藍圖有一個極大嘅敗筆，就係全部靠港府牽頭，咁就死火喇，係人都知，港產官僚不思進取，一味等運到，等到佢哋出手打救，旅遊業可能已經全部凍僵晒囉。
有辦你睇，前幾年當局大鑼大鼓話要成立旅遊業監管局，點知拖到家陣仲係無影無蹤，再叫佢哋成立更高規格嘅旅遊政策局，隨時到二○四七年都未有下文喇。更令人擔心嘅係，近年中港矛盾愈演愈烈，激進團體趕客鬧劇不斷，鼓勵遊客同居民互動喎，隨時又引嚟示威者踩場，互動變互鬥、互罵、互毆，吸客不成反變趕客咋。
再講吖，港產官僚無心無肺，唔係掛住炒樓圖利，就係掛住以權謀私，邊有閒情逸致打救旅遊業界吖。唔使講其他，假難民問題搞到香港烏煙瘴氣，社會要求打擊之聲此起彼落，港府居然闊佬懶理，連開設禁閉營都懶得研究，理鬼你旅遊業界嘅飯碗咩，指望港府積極改善旅遊配套，增加特色景點，嘥氣喇。所以咯喎，發展藍圖幾咁漂亮都好，最終咪又係紙上談兵。
話時話，旅遊業隱憂多多，點止硬件唔得，軟件一樣唔掂。最新調查顯示香港服務業去年嘅全球微笑指數只得四十八分，得分雖然同前年一樣，但名次由尾三跌至包尾，簡直失禮死人。報告指香港人笑容欠奉嘅原因主要來自經濟因素，前線員工收入大減，加上公司追數文化濃烈，工作壓力倍增。咁就大鑊喇，員工唧都唔笑，隨時進一步趕客，有旅遊藍圖又點吖。呢，今年二月酒店平均入住率只有八成，比以往下跌六至七個百分點，房價更平均下挫逾一成添，再咁跌落去，齊齊食穀種都似。
計功夫茶話齋，港產官僚冇嘢叻，最叻以權謀私，旅遊業不妨另闢蹊徑，譬如將民政事務局常秘馮程淑儀換樓醜聞嘅豪宅發展成旅遊景點，話唔定可以殺出一條血路o架。