青年新政、東九龍社區關注組等本土傘後組織計劃成立聯盟，亦有意派人參選九月立法會選舉，詳情就會喺嚟緊星期日公布。據知新聯盟依家只係得七至八個傘後組織，但唔覺有早前參與立法會新界東補選嘅本土民主前線，同埋喺社交網站宣布會考慮參選立法會嘅沙田社區網絡主席劉頴匡。本民前同劉頴匡都係本土派人士，唔知新聯盟到底係未同佢哋傾，抑或係直頭唔預佢哋呢？
青年新政召集人梁頌恆坦言，依家仲同緊其他傘後組織商討緊新聯盟嘅事，包括本民前。據了解，依家新聯盟仲未有具體參選名單，但有意加入嘅初步名單就包括青年新政召集人梁頌恆、發言人黃俊傑、成員游蕙禎、東九龍社區關注組發言人陳澤滔等人。
不過，前學民思潮召集人黃之鋒等人前日就話，會喺周日公布新政黨「香港眾志」嘅詳情，依家班傘兵又喺星期日宣布成立新聯盟，唔通想同黃之鋒等人打對台？其實同一日仲有人民力量嘅義工大會，會內都會傾立法會選舉一事。幾壇嘢撞埋同一日，睇嚟星期日會立立亂嘞！