政情：楊偉雄：喬布斯曾向我Sell嘢
話說創新及科技局局長楊偉雄早前出席一個活動時，曾經問在場青年有冇見過Steve Jobs（美國蘋果公司聯合創始人之一喬布斯），一句「我見過，我真係見過」成為金句。尋日立法會財務委員會召開特別會議，議員單仲偕發言時，再次提到上述事件，指「局長，我知你真係見過Steve Jobs，真係見過，不過我都睇過Steve Jobs套戲」，楊偉雄就揭開自己真係見過Steve Jobs之謎！
科技展以千元美金幫襯
楊偉雄回應話喺一九七七年四月十七日見過Steve Jobs，其時Steve Jobs得廿二歲，仍未成名，而佢記得Steve Jobs當時講嘅說話，所以先講出嚟。楊偉雄喺會後再補充，話自己曾喺三藩市一個科技展上遇見Steve Jobs，對方推銷佢買咗一部Apple II，價值一千元美金，而一千元美金喺當時係好多錢。已經係三十九年前嘅事，點解仲記得？可能就因為花咁多錢，難怪楊偉雄對Steve Jobs嘅印象咁深刻喇！
另外，創新科技署署長蔡淑嫻話，希望科技券先導計劃可以令更多公司受惠，依家仍約見業界聽取意見，預計五月會到立法會相關事務委員會交代進度，希望政策能夠喺第三季推出。