政情：大輝豬示挑剔 鬧爆吳得掂
身兼立法會教育事務委員會主席嘅工業界議員林大輝，向來同教育局局長吳克儉（吳得掂）勢成水火，經常向對方隔空駁火兼抽水，大輝最近更透過工作報告翻舊帳，重提吳得掂舊年底為咗去日本賞紅葉慶祝生日，缺席小三全港性系統評估（TSA）公聽會係「因私忘公」，報告仲出動豬公仔頭像襯番吳得掂。究竟大輝畀吳得掂一個「豬嘜認證」係想暗踩對方係豬，抑或形容吳得掂係豬隊友，其實兩者都冇乜分別喇！
過去曾經狠批吳得掂係業界門外漢，上任幾年一事無成嘅大輝，喺最新一份工作報告循例挑選幾名司局長逐個點評。
遊日大過天 罔顧學生利益
佢評論吳得掂施政表現時，除咗附上一個豬公仔頭像外，亦藉吳得掂舊年底缺席TSA公聽會，鬧爆吳作為「一個思想成熟和負責任的官員，絕對不會為了慶祝自己生日而不理政務、不顧學生利益」，「而堅持到日本賞紅葉，吃喝玩樂」。睇嚟大輝再一次揪吳得掂之餘，同時亦抽多次水喎。