政情：建制邀北上 林卓廷淆底
公民教育委員會每年都會向各區區議會撥款，以資助喺地區層面舉辦嘅公民教育活動，唔少社區組織都會舉辦交流團等活動，再申請資助。近日北區青年協會就向北區區議會申請支持佢哋舉辦嘅南京、杭州、上海五天交流團，但民主黨（白鴿黨）北區區議員林卓廷（阿廷）就鬧爆個計劃內容粗疏，結果畀建制派圍攻揶揄，其中本身為民建聯（民記）成員嘅區議會主席蘇西智就反建議協會，不如邀請林卓廷擔任隨團顧問，點知佢淆底，以交流團已有隨團顧問為由拒絕。
遭炮轟指控失實促道歉
北區青年協會打算八月舉辦「探索孫中山足跡」五日交流團，提供三十個名額畀十二至二十四歲青少年參加。北區區議會社會服務、勞工及經濟事務委員會尋日就協會嘅申請召開特別會議。早前已質疑該交流團係豪華團同遊山玩水嘅阿廷會上就再次鬧爆協會提交嘅計劃內容粗疏，文筆又完全唔通順，秦淮河畔、西湖觀魚及考察城隍廟等行程同孫中山冇關等。
咪以為淨係激進學生組織先至巴辣，兩位出席會議嘅二十多歲後生仔女都唔弱，其中擔任協會總幹事嘅羌蔓彤就澄清佢哋嘅交流團唔係豪華團，亦非吃喝玩樂，批評有議員對佢哋作失實指控，要求議員道歉，仲話「交流多又話洗腦，依家咪睇歷史景點多啲，又話唔畀機會年輕人，依家咪畀機會佢哋去交流。」
曾參與佔領 疑驚禁入境
可能對有人疑似恰細路睇唔過眼，主持會議嘅工聯會（工記）議員黃宏滔都暗暗揶揄阿廷︰「大家中國人要做番好中文工作，林卓廷議員咁高層次嘅都睇唔明，可能大家都睇唔明o架！」而民記嘅溫和輝就忽然扯火，話「人多就係政治」、「一係過一係唔過」，催促黃宏滔盡快表決。而蘇西智就話，雖然計劃書係有甩漏，但過往協會舉辦完交流團都會同區議會匯報，做得唔錯，認為協會可邀請林卓廷擔任交流團隨團顧問，如果協會唔夠錢，就由佢資助林卓廷嘅費用咁話。不過阿廷就以協會已有隨團顧問為由拒絕，唔知曾經參與佔領行動嘅佢係咪怕入唔到境而（火羅）爆呢？
區議會最後都係通過推薦北區青年協會嘅計劃，其實呢個五日交流團有至少三日行程都同孫中山及中國歷史有關，泛民成日都批評政府令到年輕人冇機會、冇希望，依家人哋搞交流團畀青少年參加，又何必咁吹毛求疵呢？