中環出更：葉劉唔怕食檸檬 約晤港獨黨
由理工大學退聯關注組成員陳浩天任召集人嘅香港民族黨，聲稱提倡「民族自強，香港獨立」，加上部分學界中人亦支持港獨，一下子港獨思潮有增無減，外界都想知佢哋胡蘆入面賣乜藥，分屬建制派嘅新民黨立法會議員葉劉淑儀似乎唔怕食檸檬，主動以電郵聯絡香港民族黨，以及八大院校學生會邀請見面。
首個回覆葉太邀約會面嘅係香港民族黨，尋日於社交網站專頁上載葉太嘅電郵內容截圖，披露葉太於電郵中承認，社會上本土思潮甚至港獨思想湧現，並在年輕人之間蔓延，又指本土主義本身並無問題，反問有誰不愛自己生活嘅城市。佢又話長遠來講，支持港獨趨勢更有可能傷害香港。
不介意電郵內容被公開
香港民族黨又附上該黨回應，提及葉太自稱認同本土主義，又曾批評港獨危害香港，除非對方脫離親中派，支持香港獨立，否則無事可議。樹仁學生會昨晚亦婉拒會面。
葉太接受查詢時承認曾邀約香港民族黨等會面，又唔介意電郵內容被公開，形容「預咗公開」，佢重申，自己唔會支持港獨，有關會面不應有任何前設。
卓妮