中環出更：黃鋒教打機 發掘運動興趣
早排有英國調查指兒童每日戶外活動時間唔夠一小時，比監獄囚犯更少，影響健康，雖然調查指天氣因素影響最大，但有唔少家長亦歸咎小朋友打機係其中一個原因。汕頭商會日前舉行醫療講座暨晚宴聚餐，講到健康，卓妮見到生產大型遊戲機嘅汕頭商會成員、華通科技總經理黃鋒（Kevin），佢話好多大型遊戲機都同運動有關，好似跳舞、踩單車等，仲有一啲好似曲棍球等冷門啲嘅運動，運動量唔少之餘更有機會吸引小朋友發掘興趣。
Kevin話其實打機唔一定運動少，除咗賽車、射擊、滑雪外，佢哋仲生產緊曲棍球等大型運動遊戲機，當中部分更係小朋友較少接觸又或者一班人先玩到嘅運動，好多時小朋友玩開覺得有興趣仲可以吸引到佢哋去學真正嘅運動添！而佢成長期間雖然有打機，但同樣熱愛做運動，認為兩者冇必然影響。不過近年手機遊戲大行其道，香港機舖數目大跌，由十年前五百幾間，變到得番約二百間，佢話玩手機遊戲郁動就真係相對少，長期低頭玩手機就要定時伸展吓喇！
葉振南愛與囡囡打壁球
依家小朋友百般武藝，難得休閒除咗打機，仲可以玩樂器輕鬆吓，但好多家長將樂器變成小朋友升學工具，有見及此，該會成員廖雯姬就引入外國先學彈鋼琴黑鍵嘅教學方式，話用呢個方法學琴比傳統不停練習考試歌有趣得多，唔單止省卻傳統練習嘅厭惡感，學生嘅睇譜、即興創作等能力亦會較高。
同場仲有會長葉振南、副會長陳基凱同常董張詩培等。葉振南非常注重子女健康，佢話女兒依家喺英國讀書，每次放假返港一落機就會同佢一齊去打壁球，每年個女返港六次，打波就順便當係親子活動。
卓妮