古人話，凡治國之道，必先富民，即係「藏富於民」咁解。照咁講，港鐵年年賺大錢，與其益政府庫房，不如將啲錢用來回饋市民好過。哈，有人建議港府將港鐵股息成立補貼票價基金，實行「藏息於民」喎，呢條橋有得諗o架。
係咁嘅，港府作為港鐵最大股東，每年從港鐵收取嘅股息都幾和味o架，好似上年度咁吖，港鐵向港府合共支付八十六億元，當中約四十六億元為股息。所謂「藏息於民」，即係將股息撥入基金，補貼票價，一旦落實，票價可望大減兩成；如果港府再大方啲，將港鐵上繳所得連同股息全數回水，票價更可激減三成添。
有專家認為呢個「打政府荷包」嘅方案好處多多，除咗可以令港鐵票價即時大幅下調，更可進一步用於補貼巴士、小巴、渡輪等所有公共交通服務，唔影響港鐵營運及盈利能力之餘，仲做到一視同仁，真正令全港市民受惠。
係人都知，港鐵年年賺大錢，年年勁加價，港鐵可加可減機制早就淪為只加不減機制，小市民百上加斤，搞到怨聲載道。好似今年咁吖，勁賺過百億元依然可按機制加價百分之二點七，已經連續七年加價，簡直荒謬。港府話就話要求港鐵提早檢討有關機制，問題係機制存在根本性缺陷，無論點樣小修小補，票價最多減斗零幾毫，市民唔會收貨，結果咪又係年年都拗一次。
再講吖，港鐵係上市公司，必須向股東負責，如果唔按機制加價，反而會被指摘破壞規矩；若是當局要求港鐵按盈利多寡降低票價，又會引起變相懲罰經營良好公司嘅質疑，變成做得愈好，罰得愈重，好難過到股東呢一關。所以咯喎，將上繳港府嘅港鐵股息成立票價補助基金，既可以惠民，又唔會影響股東利益，可謂雙贏，爭在港府係咪繼續做鐵公雞嘅咋。
講真，如今港府乜嘢都缺，就係唔缺錢，淨係財政儲備已達八千多億元，遠遠高於應有嘅水平，因此將每年數十億元嘅港鐵股息攞出來回饋市民，對龐大嘅庫房冇乜影響，但小市民可以即時受惠，拔一毛而利天下，何樂而不為呢？
一句到尾，港鐵年年加價已成為民怨源頭之一，今年又係選舉之年，當局再唔做啲嘢，盞畀反對派政客有可乘之機嘅咋。計功夫茶話齋，港鐵固然應該負起社會責任，港府體恤民困更係應有之義，與其被指為富不仁，不如回饋市民，你話係收買民心又好，扶貧紓困又好，總之市民可以減輕負擔就係好事，港府千祈咪繼續與民為敵吖。