中環出更：鄧家彪減肥 靠《激戰》打氣
減肥唔單止係女人嘅終身事業，唔少男人都開始以此為目標。立法會議員鄧家彪（Bill）都話要減肥，佢話自己十二年間總共肥咗差唔多二十磅，為咗激勵自己減肥，準備買兩張張家輝喺電影《激戰》嘅海報，貼喺辦公室度添！
幸福生活 累積脂肪
阿Bill以前玩划艇嘅，曾經係中文大學划艇會代表隊，當年身形相當fit，而佢嘅肥仔之路，係由結婚同有小朋友開始，家庭帶來「開心肥」外，囡囡食唔落嘅食物，亦順理成章落入阿Bill個胃，逐漸累積成脂肪，加上擔任立法會議員後，日以繼夜、夜以繼日地開會，根本冇時間做運動，佢就由○四年嘅一百六十幾磅，增至一百八十幾磅。佢話正積極考慮九月參加立法會新界東選舉，而選民對政客依家嘅要求係既要有政績，又要有外表，所以佢已經開始努力減肥，而佢操咗兩、三個禮拜就已經減咗三、四磅「口架」啦，希望四月底會有更明顯嘅效果。
卓妮