中環出更：逆市求變 「秘」策創商機
依家市道唔好，各行各業都要各出奇謀，就連商會同慈善團體營運都唔係咁容易，九龍社團聯會永遠會長高寶齡兒子司徒毅敏（Chris）同朋友陳偉龍，最近就睇準部分商會同非牟利機構想節省營運成本，決定開公司為佢哋提供秘書服務，創出商機。
Chris話好多商會同機構創辦後其實資源唔多，好多時靠會長或成員自己公司嘅秘書幫手做行政工作同會務，莫講話定時定候舉辦活動，導致機構發展停滯不前，所以佢哋就諗到不如以收月費形式，為呢啲機構提供所需行政服務之餘，更幫佢哋轉型同檢視現有營運模式嘅問題等等。
成曉華積極轉型投資
「USB之父」成曉華當日亦有出席，講起轉型，當年發明USB嘅佢都轉咗行，投資唔同行業生意，唔通因為USB已經好少人用？佢就話當年發明嘅USB係個概念，依家只係轉咗新嘅形式出現，不過發明一樣新物品的確唔易，所以佢當年申請完專利後，就用有關收益轉投資發展其他嘢。
同場仲有博愛當年顧問李豐年、副主席李鋈發、其兄東華三院副主席李鋈麟及半島青年商會前會長陳玉桂。
父親係糧油大王李廣林嘅李豐年話，糧油生意目前都要求變，計劃做跨境網購，等台灣人都可以網購香港食品，唔係淨係港人買內地同外國貨先用網購，希望港貨網購都可以發展得更成熟。
早排喺雲南扭親右腳嘅李鋈麟似乎已經好番啲，但依家又輪到左腳痛，原來因為醫生話佢左腳骨天生形狀影響，有一節骨突起，遲啲可能要做手術改善，所以現時只能着波鞋出席大小活動。
卓妮