晚清政府積弱無能，喪權辱國，卒之搞到畀八國聯軍恰到上門，今時今日話就話大國崛起，估唔到類似嘅一幕居然重演，你話係咪匪夷所思吖！
冇錯喇，講緊嘅之唔係南亞假難民兵團囉。淨係最近個幾月，粵港兩地執法部門已經拘捕近三千名來自南亞多國嘅人蛇，廣東、廣西、雲南及新疆等多個省區淪陷，堪稱現代版八國聯軍，而首次有反恐部門介入，證明人蛇問題唔係淨係偷渡咁簡單。正如「東方報業民意調查」顯示，大部分受訪者除咗不滿南亞人蛇淪為社會治安嘅毒瘤，更擔心有恐怖分子利用內地做跳板偷渡來港，香港隨時爆發恐襲危機。
唔係嚇你o架！近年疆獨問題惡化，喺阿富汗、伊拉克、敍利亞等地嘅恐怖組織當中，唔少係來自新疆嘅疆獨分子，而疆獨亦得到中東恐怖勢力嘅支持，東南亞則係佢哋嘅中轉站。本報今年初率先踢爆大嶼山淪為南亞人蛇搶灘黑點，其中兩人更加係嚟自恐怖活動肆虐嘅阿富汗，如果有極端分子混入人蛇潛港發動襲擊，後果不堪設想。
最諷刺係，本地黑幫和勝和前坐館「上海仔」郭永鴻曾經自吹佢十多年來為內地反恐提供情報喎，實情可能啱啱相反。今次被粵港當局搗破嘅南亞人蛇集團首腦「老虎仔」，正正係「南亞兵頭」巴基明嘅部下，而巴基明則係上海仔嘅頭馬，上海仔係反恐定係助恐，畫公仔唔使畫出腸喇啩。
即係咁，恐怖分子係咪乘虛而入只能拭目以待，而假難民作奸犯科，涉及嘅罪案無日無之，就係人都知。尋日之嘛，又有持行街紙嘅南亞裔人士被同鄉持鐵通襲擊，而一名瑞士男遊客到油麻地買醉後，居然被多名南亞裔人士搶走手提袋，護照同個人財物盡失。你話嘞，家陣內地客已經買少見少，外籍遊客再被假難民嚇走，旅遊業呢碌支柱仲點保得住吖。
一句講晒，天下熙熙，皆為利來，對假難民嚟講，香港簡直係遍地黃金，只要有酷刑聲請呢個護身符，打黑工又得，作奸犯科又得，如果申請司法覆核成功，隨時可以得到數十萬元嘅所謂人道賠償，即時變身「土豪」，衣錦還鄉都仲得。蒼蠅不叮無縫嘅蛋，港府咁大方，司法機構咁仁慈，假難民唔爭崩頭來港至奇喇。
與其抱薪救火，不如釜底抽薪。「東方報業民意調查」顯示，大部分受訪者認為，要徹底解決假難民問題，淨係打擊人蛇集團都仲未夠，根本之道係港府盡快研究退出聯合國禁止酷刑公約，即使暫時做唔到，至少都要重設難民營。家陣連土生土長嘅南亞裔人士亦因為假難民問題不勝其擾，支持香港退出公約，港府仲等乜嘢呀！