政情：今日你上鏡：郭偉強踢波 滿月B「冇眼睇」

父母通常都想小朋友繼承自己嘅興趣，工聯會立法會議員郭偉強前日去同城市大學舊生、教職員等踢波時，帶埋出世一個多月嘅囝囝去湊熱鬧，希望可以一舉三得，包括想囝囝曬太陽健康啲、做啦啦隊打氣及培養足球興趣，到三、四歲時就正式開始學踢波。雖然郭偉強諗得好完美，但佢囝囝就瞓到幾乎散場先起身，期間太太抱住囝囝行咗幾個圈，搞到太太唔踢波都運動量十足。至於隊友一見到佢囝囝都忍唔住要搣吓，好彩囝囝唔怕陌生啫！