政情：鄭達鴻自己「地頭」平租議辦

近日官場爆出高官離奇換樓醜聞，被質疑利益衝突兼有延後利益輸送之嫌，搞到政壇中人對樓宇租賃或買賣都小心咗好多。東區區議員鄭達鴻（阿達）位於北角嘅議員辦事處尋日開幕，作為議員新丁嘅佢，竟然有資金可以同時租用三個商場舖位做辦事處，究竟當中有咩「景轟」？

阿達喺北角區長大，熟悉區內情況，知道呢個商場舖租一向好相宜，於是一次過租用咗三個舖位。佢又話，租金已經佔咗支出嘅大部分，惟有喺請助理方面縮減開支，暫時只係夠錢請兼職助理咋。阿達又話，其他租戶最初對佢搬入去都有微言，後來發現佢個辦事處可以帶旺人流，態度先有所轉變，而佢隔籬間吉舖，近日仲成功租出添。

尋日嘅議辦開幕，唔只東區區議員畀面出席，連阿達年屆八十歲嘅姨婆亦都有撐場，姨婆話好開心見到阿達當選，希望佢畀心機服務街坊。