政情：黨內訌「被抬轎」 范國威一額汗
新民主同盟（新同盟）內部不咬弦係眾所周知，唔少黨員更不時對外大數黨內唯一立法會議員范國威係「太上皇」，經常指揮其他人做嘢。據聞，有前民主黨立法會議員支持嘅新同盟區議員丘文俊，曾經打算逼范國威代表新同盟出戰俗稱「超級區議會」嘅立法會區議會（二）功能界別選舉（超級議席），一心諗住范國威落選後自然要一併「落台」，但點知因為靠山突然退出唔參選，令丘文俊等人如意算盤打唔響，更喺黨內被邊緣化。
丘文俊失靠山 危危乎
由於新同盟今屆區選取得十五個議席，即等於有足夠提名以換取超級議席入場券，黨內一面倒支持出戰，但人選仍然未決定。有消息指，丘文俊自恃同兩名徒弟喺區選中大勝，手持新同盟五分之一提名，於是要求黨內執委提名范國威出選超級議席，否則唔會安分交出超級議席嘅提名。同時，范國威亦因為丘文俊背後有靠山出選新界東，足以對佢嘅選情有嚴重威脅，就算勝算唔高，仍然選擇出戰超級議席。
不過，一切都因為丘文俊背後嘅靠山突然放棄參選新界東而扭轉。新同盟近日已經急急放風，指大埔區議員關永業會好大機會代表新同盟出戰超級議席，而范國威將會留守新界東角逐連任。至於丘文俊，最近已經同新同盟貌合神離。新同盟司庫任啟邦尋日喺泛民主派選民登記活動上，進一步透露新同盟打算派人出選新界東、新界西同超級議席，人選方面分別係范國威、荃灣區議員譚凱邦同關永業，主打會係新界東同超級議席。
超選競爭大 左右政途
任啟邦又話，新同盟只係得番唔夠廿萬元嘅經費，選舉經費可能要靠候選人自己嘅個人魅力去籌錢喇。問到丘文俊嘅計劃，任啟邦極力否認不和傳聞。話時話，今次范國威最終未被推舉出戰超級議席，估計他都一額汗，事關超級議席同地方選區一樣競爭激烈，萬一不幸落選，政途真係「係咁大」，打回原形做番當初嘅西貢區議員。