中環出更：國貨公司轉型 年輕化抗逆境
零售市道低迷，唔少企業都轉換思維發掘商機，卓妮尋日喺沙田馬場見到裕華國貨董事總監余偉傑（Andrew）同佢爸爸余國春及阿叔余鵬春（PC）。講到近期零售市道，PC苦笑以「一殼眼淚」來形容，但好在喺呢個經濟環境下仲有姪仔Andrew夠多諗頭同活力，努力幫公司轉型，將國貨公司嘅形象大翻新，成為年輕人取經學習中國文化嘅好地方。
講起國貨公司，大家不期然會諗起嗰啲好舊式同幾乎一成不變嘅旗袍、唐裝或擺設，但Andrew話將會唔同晒！事關國貨都會隨時代改變，近日佢哋公司裝修完成後，唔止引入最近名人喜愛、由本地年輕設計師設計嘅新式長衫外，又邀請於日本學藝嘅時裝設計師擺Pop Up Store售賣具中式元素嘅男士西裝。
劃地方搞吓手作班
此外，依家好多年輕人放假鍾意做吓手作行吓市集，因此佢哋仲將部分地方劃出嚟開班教大家一啲同中國文化有關嘅手藝，包括邀請韓式裱花大師，用國貨公司買到嘅食材如黑枸杞等，炮製賣相及口味均相當獨特嘅蛋糕，又有教整旗袍同中式花紐飾物等，聽落相當吸引。
尋日入場嘅仲有理文造紙創辦人李運強及兒子李文斌、「翡翠王后」善德基金會主席董吳玲玲、「港版陀飛輪」萬希泉創辦人沈慧林及福建社團聯會青委會主任林智彬等。董吳玲玲話，今年生意麻麻，但做珠寶同翡翠最緊要貨源夠靚同稀有，價錢就一定會上升。
不過，沈慧林睇淡本港生意，寧願到北京開分店。李運強喺啱啱過去嘅復活節假期，同家人一齊去旗下位於三亞新開嘅酒店玩。佢話，雖然內地印刷生意有增長，但業務都要邁向多元化，做埋酒店及紙巾等日用品。
卓妮