古人有句話講得好啱，法之不行，自上犯之。近年香港禮崩樂壞，法治及廉政不保，當中雖然有好多原因，但歸根究柢都係因為港府高官其身不正，知法犯法。
好似民政事務局常任秘書長馮程淑儀呢單離奇換樓醜聞咁吖，最少有三大疑點，包括透過交易避稅約一百萬元、換樓補價低於市價約三百萬元、其丈夫馮永業任職政府時與換樓主角陳婉玉旗下直升機公司有業務來往。好明顯，呢單醜聞涉及官商勾結及利益輸送，跳入黃河都洗唔清。尋日有團體到廉政公署舉報，要求徹查事件，當局唔好又詐傻扮懵吖。
講起真係諷刺，好似馮程淑儀呢種官僚做嘢唔叻，最叻就係以權謀私，除咗涉及呢單換樓醜聞，佢仲係炒樓專家添。二○○○年至二○○七年間，馮氏夫婦先以公務員按揭福利作為跳板，不斷炒賣物業，炒一間賺一筆，估計多年來累積獲利逾五千四百萬元，都咪話唔和味。所以話，香港樓價咁貴唔係冇理由o架，連高官都帶頭炒樓，唔貴至奇喇。可憐嗰啲無殼蝸牛想搵塊瓦片遮頭都難，果然係同人唔同命。
事實證明，天下烏鴉一般黑。內地腐敗成風，幾乎無官不貪，香港話就話未至於咁離譜，但亦唔好得幾多，尤其係前朝曾蔭權爵士七年任內，官商勾結更加明目張膽，搞到烏煙瘴氣。曾爵士本人固然涉及連串醜聞被起訴，前政務司司長許仕仁更因貪腐而入獄，前廉政專員湯顯明也因涉嫌假公濟私一度被廉署調查，今次輪到曾爵士嘅愛將馮程淑儀醜聞纏身，講得好聽啲係物以類聚，講得難聽啲係蛇鼠一窩。
講到呢度，大家應該知道點解香港七國咁亂，高官一個二個掛住以權謀私，唔係同富商勾勾搭搭，就係絞盡腦汁換樓搵着數，而正經嘢就冇人肯做，有乜法子唔亂。好似假難民問題咁吖，唔止成為財政負擔及治安毒瘤，而且隨時被恐怖分子滲入，港府明知危機重重，但一味拖拖拉拉，遲遲唔肯採取果斷措施，連設立禁閉營嘅建議亦當耳邊風，你話係咪豈有此理吖？
冇法子喇，紀綱一廢，何事不生。港府實行高薪養廉政策，原意係叫官員安分守己，做好份工，點知結果啱啱相反，高薪養廉變成高薪養貪，證明人心不足蛇吞象，旨意港產官僚廉潔奉公，等於與虎謀皮。咁多年來，官員利用手上權力為商人謀取利益，而商人就向官員提供延後利益，呢啲例子多不勝數，馮程淑儀嘅換樓醜聞只係冰山一角咋。
無論點都好，港府施政混亂，民望低殘，如果繼續包庇貪官，盞激起更大民怨，唔衰攞嚟衰！