喺建制派同泛民主派議員人數相若嘅沙田同深水埗區議會，所有區議員都全數加入區議會轄下嘅委員會，企圖爭奪委員會主席之位。不過，當大部分委員會主席職位塵埃落定後，沙田區議會竟驚現退會潮，建制同泛民都分別有區議員退出不同委員會。有地區人士就批評退會行動無政治道德，質疑只為主席之位，無視議員責任。
根據沙田區議會文件，民主黨區議員鄭則文同建制獨立議員蕭顯航早前去信區議會，要求退出教育及福利委員會；而蕭顯航更同時退出財務及常務委員會。有地區人士指，呢個係「冧友」選主席之後嘅常見現象，批評退會無政治道德，認為議員有責任開會，唔可以做地區事務為由逃避，又指會議時有議員請假，唔係非退委員會不可。
蕭顯航解釋，當選後多咗很多公職，包括出任青年會、醫院管理局嘅區議會代表，而上述嘅公職開會時間與委員會開會時間相撞，故不得不退會。佢又話教育及福利委員會、財務及常務委員會唔係討論啲咩大事，有時間會重新加入。
同樣係泛民建制角力嚴重嘅深水埗區議會，主席張永森則指，未有議員聲稱要退出委員會。民協區議員譚國僑分析，部分委員會和工作小組仍要選舉增選委員，估計建制派暫時唔會輕易退會，同時避免畀泛民有機可乘。