政情：八網難逃：二創超人 謝偉俊有「法」

早前立法會審議《二○一四年版權（修訂）條例草案》時火花四濺，本身係律師嘅立法會議員謝偉俊（Paul）就向歌曲創作人開火，話啲創作人「不思進取」、「食老本」、「上咗位」唔使積極創作，就唔介意其他人抄襲版權。點知Paul就畀人寸返轉頭，話佢個法律超人造型先至係二次創作「食老本」。話口未完，幾日後Paul就推出咗全新設計嘅法律超人漫畫公仔，漫畫造型依然係傳統超人嘅藍本，戰衣都係選用紅藍色，只係心口個「S」字改做「法」字，漫畫已全面應用，唔知佢今次又有冇徵得超人版權人嘅同意呢？