政情：梁世民：漂牙應搵註冊牙醫
近年唔少美容院推出藍光漂白牙齒服務，更於多個社交網絡展開宣傳，吸引一眾愛靚之人嘗試。牙醫學會會長梁世民（Sigmund）就話，漂牙係醫療行為，有關療程應該由註冊牙醫進行，而進行藍光漂牙前亦須檢查清楚口腔同牙齒狀況係咪適合，美容師對此卻未必了解。
Sigmund話，漂牙亦有風險，因為喺蛀牙地方滲入漂白劑，唔單止感覺痛楚，牙齒亦可能會變得相當敏感，但喺美容院進行漂牙療程就未必會事先做足檢查，所以奉勸大家想靚都係搵番專業牙醫做好啲。佢仲話，近年各大牙膏品牌都推出敏感牙齒用嘅牙膏，呢個可能同港人平日愛飲檸茶、檸水或汽水嘅生活習慣有關，而長期飲用會損害牙齒表面嘅珐琅質，令牙齒變得敏感。
講番牙醫近年面對嘅挑戰，Sigmund就話係商場不斷加租，以佢位於石蔭邨嘅診所為例，今年就被提出加租四成，經多番磋商後，雖然只加租兩成，但成本仍上升一大截。