中環出更：張超雄被譏「難民之父」
香港嘅酷刑聲請機制近年被濫用，引發唔少罪案，但政府一直「無知無覺」，引起社會各界及多個政黨都關注南亞假難民個案急升問題，紛獻計解決社會危機。不過，工黨立法會議員張超雄與政府一樣「無知無覺」，反而關注滯港難民嘅人權，唔知係咪因此而惹來不滿，近日喺鬧市街頭發現有橫額諷刺張超雄為「難民之父」，兼中英文介紹張超雄「致力為南亞難民提供援助」，橫額設計相當認真！不過，張超雄對於被奉為難民之父就絕對唔領情，仲指有人冒認佢同工黨名義喺街頭掛橫額惡搞。
鋪相自揭遭惡搞
張超雄尋日於社交網站上載有關橫額相片「自首」，原來係想揭發有人冒認兼抹黑佢，強調工黨根本無掛過嗰批橫額。張超雄其後解釋，佢的確關注弱勢社群，而政府「龜速」審批難民資格嘅同時，酷刑聲請者面對非人道環境，佢只係希望政府加快審批程序，如果關心邊個群體就係乜乜之父，咁佢就會變成「長者之父」、「弱勢之父」，難民之父嘅稱號係抬舉佢喎。佢仲話，亂以他人名義掛橫額係刑事罪行，呼籲對方向警方自首，但同時又讚橫額個設計唔錯。
卓妮