中環出更：新民黨5歲 葉劉：證明企得住
近年黨運亨通嘅新民黨不經不覺已經五歲大，身兼行政會議成員及立法會議員嘅主席葉劉淑儀帶領副主席田北辰、潘國山等人，尋晚喺灣仔會展筵開一百零五席慶祝，高官及政界人士畀面出席。葉劉致詞時話，新民黨自一一年成立以來，經歷四場大小選舉，至今已經可以幫友黨助選，證明該黨真係企得住腳。最近積極招兵嘅新民黨，轄下青年委員會仲同新加盟嘅大律師容海恩（Eunice）表演娛賓添！
新民黨五位青委用膠筒表演敲擊樂，其中青委會新任主席王家揚帶領副主席葉沛霖同Eunice向高難度挑戰，苦練閩南話獻唱《愛拚才會贏》。
青委獻唱閩南歌娛賓
踏慣台板嘅Eunice一開腔已震懾全場，但佢笑言其實唔識閩南話，多得本身係福建人嘅王家揚做「教官」練歌練足三日三夜。Eunice好自豪話學生時代係唱女高音，即使上台唱低音亦得，果然「高音甜、中音準、低音勁 」。
公務員事務局局長張雲正最近行桃花運，與「八十後」新聞主任「撻着」，司局長中唯一剩低律政司司長袁國強係「鑽石王老五」，身價「含金量」再創新高。不過，最近身形清減咗嘅袁國強就大耍太極話「對個別事件唔評論」，講到擇偶條件，佢更苦笑稱：「我邊有資格講條件，係都解決咗高鐵一地兩檢先！」
講到喜事，最近積極「造人」嘅南區區議員陳家珮笑言仍然努力中，暫時未有好消息公布。屯門區議員甘文鋒向準太太Claire求婚兩年依然未正式簽字，Claire笑言係佢「拖住」甘文鋒，因為想等自己進修畢業先結婚，但甘文鋒未來幾個月又要為新民黨備戰立法會選舉，相信又要再等吓先正式做到甘太喇！
卓妮