嶺南大學學生會換屆接近一個月，前學生會會長劉振琳與前人力及資源幹事盧藝賢被嶺大紀律委員會傳召，要求佢哋出席本月八日有關二月份學生會圍堵校董會事件嘅紀律聆訊，但兩人早前已經表明唔會出席。嶺大學生會尋日舉行記者會，委員會嘅學生代表文韜話，今次聆訊會議內容保密，但佢表明如果校方喺無學生作證情況下就作出嚴重懲罰，佢唔排除會考慮披露聆訊會議內容。
文韜除咗係紀律委員會嘅學生代表，仲係啱啱上任嘅學生會外務秘書長，佢認為校方今次對兩位同學嘅處理手法並唔合理，更形容為「秋後算帳」。文韜揚言，如果校方夠膽喺冇任何證供、當事人缺席聆訊嘅情況下，只以簡單判斷而作出例如中止學歷、休學等嚴重處分，佢會盡能力去阻止，亦會考慮喺校方公布聆訊結果後披露聆訊內容。做法似足港大學生會前會長馮敬恩洩露校委會會議內容。
另外，學生會亦會喺下星期搞聯署，除咗要求校方撤銷對兩位同學嘅紀律聆訊外，仲要求校方承諾唔可以再紀律聆訊，以及要求校方履行承諾成立專責小組以檢討大學條例。學生會會長鄭沛倫就話，會喺紀律委員會聆訊會議當日遞交聯署信。