俗語話，人之將死，其言也善；鳥之將亡，其鳴也哀。古代官員在職時就算點樣昏庸無能，語無倫次，離任時總會講番幾句人話，務求為百姓留低少少好印象。點知依家有啲官員連咁簡單嘅道理都唔識，在職時搞風搞雨，離任時仲要撩是鬥非，唔到你唔服。
冇錯嘞，功夫茶講緊嘅就係人稱「廢鑊」嘅周一嶽。尋日係佢擔任平機會主席嘅最後一日，本來靜靜雞自動消失咪算囉，偏偏佢不甘寂寞，臨走前仲要出嚟獻世，又話自己上任之初已預計只會做三年主席，又話對港府未有積極回應性傾向歧視條例立法感到失望，甚至對新任主席陳章明指指點點添。
嗱，呢啲咪就係虛偽兼無恥囉，如果周一嶽上任之初已預計只會做三年主席，就唔會報名參加新主席招聘遴選喇。係人都知佢官癮十足，三年任期屆滿本來想賴死唔走，結果人算不如天算，首輪遴選就被淘汰，眾望所歸，無得留低，唔衰攞嚟衰。
所以話，無恥嘅人見得多，未見過咁厚面皮嘅。周一嶽執掌平機會咁耐，醜聞爆足咁耐，亂花公帑、私下擴權、肥上瘦下、打壓異己，早就成為眾矢之的，尤其係佢偏袒性小眾團體，更搞到滿城風雨。一個醜聞纏身嘅廢官唔引咎辭職不特止，仲企圖繼續冧莊，究竟知唔知個醜字點寫o架？
最離譜嘅係，周一嶽明知任期屆滿，仲要多管閒事，指平機會新任主席陳章明認為現有條例能夠保障性小眾免受歧視，係理解有誤喎。喂，不在其位，不謀其政，周一嶽自己衰就算嘞，連新主席都唔放過，唔通佢真係想做太上皇？有團體忍無可忍，尋日帶同橫額到平機會抗議，要求周一嶽離任後唔好干預下一任主席，證明佢幾咁不得人心。
正如團體批評，周一嶽以反對性傾向歧視為名，公然偏袒性小眾團體，甚至越權濫用平機會資源推動同志平權活動，而早前發表嘅有關性傾向歧視立法研究報告，更帶有嚴重誤導及引導性。冇錯嘞，周一嶽喺平機會主席任內唔單止冇做過一件正經事，反而成日無事生非，製造矛盾，除咗為港府添煩添亂，而且令社會進一步撕裂，咁都仲想做太上皇，簡直不知自量。
歸根究柢，周一嶽之所以能夠翻閹做平機會主席，皆因港府有眼無珠，居然喺垃圾桶摷出呢個廢電池，你話係咪咎由自取吖。老實講，就算香港真係缺乏人才，亦不至於如此飢不擇食o架。總而言之，慶父不死，魯難未已，好似周一嶽呢啲庸官早走早着，希望佢一路好行，唔好再出嚟獻世喇！