政情：公民講場：被叮扮唔撈 廢鑊厚面皮

任內醜聞不絕嘅平等機會委員會主席周一嶽（廢鑊）今日終於正式被政府「叮走」，由陳章明接棒。不過，廢鑊尋日接受電台訪問時仍然死撐三年前上任時已經準備只係做三年，又話呢個崗位好少會有人留低，仲直指新任主席陳章明對保障性小眾嘅理解有誤，完全不留情面。不過，眾所周知曾任平機會委員嘅立法會議員謝偉俊早喺年初已經喺立法會委員會會議上，踢爆廢鑊有份參與遴選爭取連任，而陳章明早前接受訪問時亦不諱言，早於去年底已經有獵頭公司先後兩次邀請他應徵平機會主席，廢鑊最終不敵陳章明，估唔到廢鑊臨走前仲要死撐，真係唔知醜！