政情：減肥變皺皮 樹根憂選情
曾經從事電腦操作員嘅立法會議員鍾樹根，最近又購入電子產品，講緊係佢手上用嚟量度運動同睡眠質素嘅手環，統計數據會直接顯示喺手機。樹根又話，佢已經訂立咗每日行一萬五千步嘅目標，相信喺配合飲食下，一星期可以減一公斤，而最終目標係可以減走十公斤。
講開減肥，樹根透露曾經一次過減咗好多磅，但點知皺晒皮，有街坊仲投訴話如果佢唔執番正個樣就唔投票畀佢，唔知佢今次嘅減肥計劃會唔會因此陷入兩難呢？
樹根又話雖然成日都要留守立法會，但認為唔可以睇小喺立法會嘅運動量，平日行上行落原來都有三千步，所以對達標非常有信心。
陪埋太太敷面膜
對於街坊咁注重佢嘅外表，佢就話今次唔會一次過減太多，希望做到一星期減一公斤。佢仲透露平日會跟太太一齊敷面膜，搞到咁白滑，唔通鍾太唔驚樹根出去搞搞震？