中環出更：邵家輝接棒 隨時變跌棒
立法會批發及零售界議員方剛已經做三屆共十二年議員，上屆更自動當選，議席幾近成為自由黨嘅「黨產」。今年七十三歲嘅方剛一直傳佢會交棒畀黨友、東區區議員邵家輝（Peter），但盛傳裕華國貨董事總經理余鵬春都想乘虛而入，話晒余鵬春在業界地位舉足輕重，落場有一定優勢，咁嘅形勢之下，Peter會唔會接唔穩呢支棒呢？
方剛尋日出席傳媒茶敍時坦言，已經積極帶Peter同業界代表「打招呼」，但之後係點，就要睇吓Peter嘅造化喇。對於余鵬春亦唔係省油的燈，方剛話參選就好似游泳比賽咁，落得場就唔好掛住望人哋攞到幾多票，只要顧住自己出力游就得。
零售界拓網購自救
不過，方剛睇見最近本地零售市道咁差，決定同本地業界率先自救，商量將香港品牌打入內地網購平台。
佢慨嘆內地客唔到訪香港，港人又趁長假期離港，根本無人留港消費，索性自行殺出網購新血路，呢條橋同中華廠商聯合會近日構思嘅網上工展會又幾似喎。
卓妮