中環出更：一屋女人 朱鼎健自嘲「外父相」
香港潮屬社團總會早前舉辦「潮拼天下」頒獎禮，嘉許努力拚搏並有成就的年輕一代潮州人，希望佢哋可以將呢啲優良傳統繼續發揚光大。卓妮見到得獎者之一的觀瀾湖集團主席兼行政總裁朱鼎健（Ken），佢話新一代潮州人保留勤奮的美德外，仲係超級好老公，一啲都唔重男輕女。
Ken笑言自己一睇就知係「超級外父相」，事關佢有三個乖女，加埋佢太太一屋女多過男，平日返到屋企都係聽晒老婆話，認為潮州新一代一啲都唔大男人，相反仲非常體貼添。講起自己得獎感受時，佢話知道創業難守業更難的道理，因此當初決定不如自己創業，仲形容自己係「創二代」唔係「富二代」呀！
方平獲女兒盛讚「愛妻號」
有外父相嘅仲有潮屬社團總會秘書長方平及汕頭商會會長葉振南，話說方平家中都有三個千金，其中大女及二女仲陪佢一齊出席活動，佢太太就陪細女喺澳洲讀書。大女方遜話，爸爸係個嚴父，好在佢哋好早就出國讀書，避過摩擦，但就話爸爸係「愛妻號」，好似一聽到老婆唔舒服，就即刻飛過澳洲探望，可以話係廿四孝老公。至於葉振南就有兩女一子，兒子去年成家立室，佢多個新抱又好似多個女咁，非常開心。
不過，潮州女人做太太又係點嘅呢？中電企業發展總裁莊偉茵與潮州商會會董張詩培都係潮州人，唔好睇佢哋平日成個女強人，分配時間都係佢哋強項，平日莊偉茵大部分活動都同老公有影皆雙；而張詩培在頒獎禮當日撞正生日，活動後就急急去同老公二人世界浪漫慶祝。
卓妮