港府開口「老有所養」，埋口「老有所依」，擺出一副敬老姿態，其實只係大隻講咋。今時今日好多基層長者體弱多病，固然晚景堪憐，即使精精靈靈，行得走得，亦係度日如年。
係人都知，港府安老政策天殘地缺，千瘡百孔，特別係政府資助宿位嚴重不足，基本上只能照顧缺乏自理能力嘅長者，其他老人家惟有自己顧自己。為解決呢班有自理能力嘅基層長者住屋需求，有慈善團體喺公共屋邨開設自負盈虧嘅老人之家，提供三百多個宿位畀長者廉價租住，仲會定期舉辦各種社區活動，幾受老人家歡迎o架。
好似年近八十歲嘅李婆婆咁吖，因為婆媳關係唔好而搬出嚟住，經社工轉介入住老人之家，同其他老人家有傾有講，得閒仲會參與陪診及探訪等義工服務，生活多姿多采。
即係咁，呢類老人之家嘅最大貢獻，除咗解決老人家居住需要，亦令長者覺得老有所為，可以講係功德無量。再講喇，長者入住呢啲宿舍，亦可以紓緩護老院資助宿位不足嘅壓力，港府應該大力支持至係，可惜事實啱啱相反，社署自○三年停止資助所有長者宿舍，並將宿舍轉為護老院後，就再冇其他長者宿舍向健康長者提供服務。其實，隨着人口愈來愈老化，市民愈來愈長壽，長者宿舍嘅需求只會愈來愈殷切，老人之家由五年前毋須輪候，到依家平均需要輪候超過一年，證明已經供不應求，而港府居然闊佬懶理，問你服未。
講起真係諷刺，港府成日鼓勵市民「居家安老」，一時推出長者社區照顧服務券，一時推出護老者津貼，可惜姿勢大過實際。家陣超過四成接受日間護理中心服務嘅長者患有認知障礙症，但只有七間提供相關服務，完全滿足唔到需求，所謂「居家安老」，即係將責任推卸畀市民啫。
難為當局口口聲聲投放資源照顧有長期護理需要嘅長者，但事實係，政府資助長者宿位長期僧多粥少，搞到每年都有數千名長者輪候期間含恨而終，而買位私營院舍又無監無管，放任自流，以致虐老醜聞無日無之。港府唔肯增加宿位，一味叫長者北上安老，之後就關人個關，港產官僚對長者有幾大承擔，唔使多講嘞啩。
正如古人話齋，為長者折枝是不為也，非不能也。港產官僚麻木不仁，涼薄成性，自己唔肯照顧老人家都算嘞，對慈善團體嘅善舉都唔肯支持，仲有冇再離譜啲吖。講到底，安老政策應該多管齊下，靈活變通，唔可以一本通書睇到老，特別係老人之家呢類設施，既可以幫到長者，花費亦唔多，何樂而不為呢！