政情：公民講場：羅致光「怪談」退保 錢非最大問題

扶貧委員會最近正就全民退休保障諮詢公眾，民間就唔同方案火花四濺，扶貧委員會轄下關愛基金專責小組主席羅致光尋日出席電台節目時亦承認，全民退保爭議大，加上商界對全民退保好大保留，要喺社會達成共識有困難。不過，佢認為全民退保面對嘅最大問題唔係「錢」，反而係目前政治制度未能解決社會爭議同矛盾，但佢同時補番句，社會應該先討論加稅、開徵新稅，再討論退保會較易達成共識。羅致光兜咁大個圈，講到底全民退保最緊要都係錢，倘若政府唔加稅、徵稅，社會有幾大共識都好難長期落實全民退保囉！