政情：陳振彬專注推展青少年軍
立法會選舉九月舉行，之前有傳觀塘區議會主席陳振彬（Bunny）有意出戰九龍東直選，但近期佢已經表明唔會出戰。不過，咪以為Bunny唔選立法會就好得閒，因為除咗區議會工作外，其實佢仲要專注由佢擔任主席嘅香港青少年軍總會（總會）嘅推展工作。記得總會去年初成立之時風波不絕，但至今話咁快已經一年有多，當時好多人批評完之後似乎已經遺忘咗件事，咁到底總會依家搞成點呢？
好多學校排緊隊申請
Bunny話，青少年軍縱隊同團員人數已由最初八十人增長到二百五十人，並成立教導、菁英及地區三個縱隊，除咗展開恒常步操和軍體拳訓練外，亦有領袖、急救及野外求生等培訓；而當中亦培訓出三十名教練，回饋培訓生力軍。Bunny坦言，近兩年社會環境撕裂又激進，好多學校都受影響，部分學生因為唔想被排斥而扮成「黃絲」，但有唔少學生參加完訓練後，都變得好有紀律及自理能力，返到屋企後都唔使父母勞氣激心。
對於外界指青少年軍係「洗腦」訓練，Bunny就話其實想加入一啲都唔容易，依家有好多學校排緊隊申請，當中不乏名校，仲要經挑選後先獲取錄，所以係咪「洗腦」，大家可以自行判斷。