公職人員利益申報愈嚟愈要求透明度，但並非人人都上心，時時更新「近況」。我哋最近翻查行政會議成員個人利益登記冊，發現身兼新界鄉議局副主席嘅行會成員張學明，詳細申報喺農曆新年期間收咗幾份逾二千蚊嘅禮物，包括中藥禮盒、年糕券、海味禮籃，連動物陶瓷座枱擺設都有人送，但張學明申報只係收咗陶瓷擺設當紀念品，其他禮物就與同事開心Share。
其他行會成員都有勤力更新利益登記冊，身兼港區全國人大代表嘅羅范椒芬最近申報出任南旋控股有限公司獨立非執董，經營針織品業務。南旋集團係由港區全國人大代表王庭聰出任主席兼行政總裁，兩人都係港區人大，認真湊巧。已經離開政府嘅羅范椒芬不愁出路，佢本身已經擔任中電控股獨立非執董，連電訊及文化業務都撈埋。
另外，行會成員廖長城亦申報加入中國會，會費六位數字起跳，另一行會成員葉劉淑儀都係中國會會員。不過，另一行會成員李國章出任港大校委會主席近四個月，但至今仍未申報自己已「升呢」做主席，莫非近期嘅港大風波令佢無時間更新個人資料？