政情：葉問上身 吳秋北交足戲
每年五月一日勞動節，各個勞工團體、組織都會透過遊行請願為打工仔發聲。其中工聯會最近就推出五一大遊行宣傳海報，外號「吳揪得」嘅工聯會理事長吳秋北明顯模仿詠春大師葉問嘅造型，拍攝多張硬照扮「揪得」做宣傳。未知宣傳照造型係咪惹嚟批評，吳秋北前晚喺社交網站澄清「完全沒有抽明星水嘅意思，也沒自我宣傳嘅企圖」，仲自稱「交足戲」好過「李賊人」（工黨李卓人）喺泥頭山事件中做無賴騷。
明寸「 李賊人」做無賴騷
平日斯斯文文嘅吳秋北，突然換上一套功夫衫，擺出各種手形，又打木人樁，一睇好自然聯想到葉問。吳秋北前晚喺社交網站強調唔係抽水同自我宣傳，又指「重複別人，跟人尾巴走太沒志氣」，只為勞工權益宣傳先「交足戲」。話口未完，吳秋北就抽李卓人水，指「這『戲』當然沒李賊人（李卓人）喺泥頭山事件中嘅無賴show（做）得好」。其實睇完成輯相，真係猜唔透工聯會想sell乜，加上每年都會舉行五一大遊行，需要大費周章拍宣傳品咩？