政情：搶超選提名票 泛民鬼打鬼
泛民主派一邊反對小圈子選舉，一邊又對俗稱「超級議席」嘅立法會區議會（二）功能界別議席趨之若鶩，真係自打嘴巴。今年九月舉行立法會換屆選舉，多個泛民黨派均覬覦超級議席，為爭取足夠區議員提名票鬥得火紅火綠，「鬼打鬼」亦在所不惜。不過，經歷去年底區議會選舉後，只有泛民大黨先有合適人選及取得足夠提名出戰，其他泛民政團唔係「有提名無人」就係「有人無提名」。
現時泛民佔三席超級議席，民主黨（白鴿黨）佔兩席，民協有一席。現時超級議席入閘門檻係要取得十五名區議員聯署支持，回顧去年區議會選舉結果，白鴿黨區議員足以提名兩人參選，民協區議員亦可以提名一人出戰，可惜現時形勢與四年前情況有天淵之別，皆因白鴿黨及民協均喺區選損兵折將。
AV仁馮檢基無得入閘
有「AV仁」之稱嘅白鴿黨立法會議員何俊仁喺去年屯門區選中落敗，失落出戰超級議席嘅機會，反而黨友涂謹申（阿涂）就成功連任油尖旺區議員，阿涂出選應該問題不大，但如果派元朗區議員鄺俊宇（Roy）出選超級議席，或會有人質疑白鴿黨係咪壟斷，由於唔少人對該黨仍有原罪感，雖然Roy算係黨內最能夠與網民溝通嘅人，但最終能否出選仍係未知之數。
至於民協馮檢基同樣喺去年區選連任失敗，雖然民協有足夠提名票，但要搵有知名度嘅人出選就困難重重，如果真係派青年民協主席何啟明出選，隨時贏唔到議席，仲會分散泛民票源。喺咁嘅情況下，就吸引多個政黨或政團有意加入戰團，其中新民主同盟有足夠提名票，又可派出立法會議員范國威出選，係最有機會先拔頭籌。但其餘政黨就要爭餘下嘅提名票。
梁耀忠想打傘兵主意
其中知名度較高嘅街工梁耀忠，就只得五張區議員提名票，據聞佢正向其他泛民黨派、甚至八名傘兵借提名入閘。而知道八名傘兵重要性嘅，仲有獨立泛民、有「新東第一刺客」外號嘅沙田區議員陳國強。佢早前已經率先喺社交網站宣布參選超級議席，據聞佢獲多名泛民區議員支持，亦相信有唔少人望佢出閘攪局。最後邊個可以加入超選戰團，睇嚟真係要買定花生等睇戲喇！