中環出更：食品業界名人 為市民健康把關
前稱「香港食品業總會」嘅香港食品委員會早前舉行成立三十二周年晚宴，並首次頒發「百年食品品牌」獎項予十二個歷史悠久嘅百年老店，數百名城中食品業界人士齊去見證開心一刻。早前消費者委員會高調關注蔬菜殘留除害劑及肉類使用抗生素問題，卓妮梗要趁機問吓食肆老闆們點樣為市民健康把關，又有咩養生「解藥」可以排吓毒呢？
身兼香港餐飲聯業協會主席嘅翠華集團老闆李遠康話，佢哋採購肉類食品依足世界衞生組織標準，所以市民可放心食用。講到排毒養生，佢經常食秋葵、麥皮及多飲水，有助身體排走毒素。代理同仁堂藥品嘅泉昌董事總經理黃光輝就話，市面都有唔少清熱解毒中成藥，不過想食「解藥」清走殘留農藥或抗生素，最好睇中醫對症下藥喇。
酒樓啤水機幫菜做SPA
做酒樓生意嘅香港餐務管理協會主席楊位醒話，佢哋唔只擔心蔬菜殘留農藥，連啲沙泥洗唔乾淨都隨時被客人投訴，所以現時一般酒樓都有新做法，就係用「啤水機」洗菜，不停打氣入去製造漩渦反覆清洗，好似幫蔬菜做SPA咁，仲因此而提高咗水分含氧量，令蔬菜嘅顏色更加青綠色添！
同場仲有獲頒「卓越成就獎」嘅李錦記集團主席李文達、中華出入口商會會長張學修及常董彭楚夫等人。香港食品委員會會長陳建年話，香港食品一向有質優價廉及安全可靠嘅優勢，今年將繼續舉辦多項大型活動，推動本土食品發展之餘，亦促進國際合作。
卓妮