「學運小英雄」據云已有毛有翼，覺得自己長大成人，終按捺不住要組黨參選，準備參與九月的立法會選舉。黃毛小子備受爛果報及外國傳媒吹捧，又是「佔中領袖」，年紀輕輕，又成為「全球百大思想家」，風頭一時無兩，難怪佢鬆毛鬆翼，磨拳擦掌想走入議會喧嘩玩吓啦！
之不過，佢以「全新面貌」接受某電台訪問時，又扮大爺例牌遲大到，搞到主持人用「唏噓」形容自己嘅心情，唉！之前，黃毛小子出庭應訊亦遲到半粒鐘，已經被法官公開斥責佢要留時間「做大事」。
有論者指「小英雄」要從政，要知道政治乃眾人之事，想做得成功，首先要學懂尊重他人。遲到打亂晒人哋嘅計劃，的確不該！老朽想起曾任廣州嶺南大學首任校長嘅鍾榮光博士，有《午睡詩》：午後小眠十五分，有客敲門不起身。莫怪先生無禮貌，先見周公後見人。呢位教育家居於全西式之九龍飯店時，撰有一聯曰：「一等唐人二等鬼，三餐大菜兩餐茶。」睇嚟「思想家」確有腦為自己謀後路，若然一個唔覺意「三分天下」走入垃圾會，憑街頭抗爭做了「一等唐人」，高薪厚酬只要發揮其嘴藐藐本能，狂呼亂嗌乩童上身被逐出議事堂，「莫怪小子無禮貌，先見周公後見人」，又小睡補吓眼先，你都咪話唔過癮！
「學運小英雄」大言炎炎，話新政黨以「公投、修憲、自決、普選」為綱領！小子之志大矣，被激進勇武者批評得一文不值嘅泛民主派，喺議會又拉布又搗亂咗咁耐，仍然未能實現普選，黃毛小子又何德何能「又公投又修憲又自決」？也許，黃毛小子「先見周公後見人」，於迷迷糊糊的夢境，確實見到螞蟻絆倒大象腿！港產「思想家」，確係神仙放屁！不得不令人另眼相看！甚麼「眾人之事」、「學懂尊重他人」，根本就係不知思想為何物！