探射燈：旅遊達人教路：行李放視線範圍

機場巴士偶爾會成為小偷「搵食」之地，如去年十二月，三名外地旅客便在乘搭單層機場巴士時，遭偷走放在行李架上的行李篋，共損失二萬六千多元財物。去年一月，亦有一名專偷空姐行李的男子被捕。早年更曾有指每逢大時大節，「機場巴士老鼠」就會出動，高峰時期行李失竊的情況每周便有一宗。

旅遊達人項明生指出，過去曾有朋友試過遺失行李，「不過係畀人偷定畀人拎錯咗就唔知啦。」他續指，為免被人「拎錯行李」，會在行李貼上不同貼紙，以資識別，「同埋一定唔會坐上層，行走江湖得耐，會將件行李放喺視線範圍。」

對於機場巴士的服務，項則坦言不俗，「可以講好過八成嘅其他地方！」他表示，本港機場巴士收費不算高，而且車廂新淨，「除非係同日本、北歐比，如果唔係（本港機場巴士）真係好唔錯。」他續指，部分地方的機場巴士衞生情況不堪入目，「係甩頭甩骨，巴士上面仲會有曱甴。」