工業界立法會議員林大輝（大輝）尋日出席立法會民政事務委員會時大賣廣告，搞到金融界議員吳亮星（星爺）都忍唔住笑，話大輝好快會收到廣告費用單據，到底係咩咁值得大輝落力推銷呢？
話說會議討論到青少年嘅體育發展，大輝提到體育學院、林大輝中學及英基學校合作嘅夥伴學校計劃，質疑政府數字唔得清晰。在席議員一聽到林大輝中學就大笑，但大輝就氣定神閒，反而叫大家靜啲咪咁興奮，講明該校係由佢創辦，仲講埋學校地址當利益申報添。
其後議員陳志全（慢必）就建議全港學生習泳，認為愈早學識游水愈易上手，仲透露自己泳術差。點知大輝又把握到機會，話學校每年暑假都舉辦游泳班，仲拍晒心口話「六堂教曉」，叫慢必介紹唔識游水嘅朋友去佢間學校報名添！