政情：前局長黎慶寧學耍真太極
好多前高官退下來都「不在其位，不謀其政」，保安局前局長黎慶寧亦都唔例外。黎慶寧自從回歸後一年退位讓賢後，就去咗香港大學教書，鮮有在公開場合露面，行事保持低調，就算露面都避談政治。黎慶寧面對記者識耍「太極」避而不談外，依家仲學識耍埋「真」太極，佢透露最近先學太極，學嘅係楊家太極拳。
黎慶寧尋日以皇仁書院大師兄身份，同一班師弟到「PMQ元創方」參加導賞團。講起以前讀中學嘅事，黎慶寧就話以前好鍾意打籃球，仲要由中一打到會考前兩個月，但佢就冇加入校隊，只係與同學一齊打。雖然佢依家仲好鍾意做運動，可以強身健體，但隨着年紀愈來愈大，唔可以再打籃球，所以就轉玩耍太極。不過，佢年輕時行山嘅習慣依然會繼續，但呢幾年唔行得好遠，只係行吓港島區，而年輕時就會行吓西貢，覺得風景好靚喎。