立法會《二○一六年證券及期貨（淡倉申報）（修訂）規則》小組委員會原本尋日早上八點半召開首次會議，點知出師不利，首次開會就因法定人數不足而流會，連主席都選唔到。小組成員分別有民建聯陳鑑林、經民聯梁君彥及張華峰、公民黨梁家傑及民主黨單仲偕共五人，但尋日就只有陳鑑林和梁君彥兩個出席，即使過咗十五分鐘法定開會時限，都依然欠一個人先湊夠法定人數，搞到小組流會收場。
缺席會議嘅張華峰表示，他因為要拜訪領導而離港，但強調一知道會議時間撞期就已向秘書處請假。佢認為經常流會對立法會必然唔係好事，但泛民經常刻意製造流會，建制派實在難以應對，所以有時流會係難以避免。
至於梁家傑就話，依家交代缺席原因係冇意思，但就缺席會議一事向所有市民道歉，承諾會準時出席下次嘅會議。「交代缺席原因係冇意思嘅」都噏得出，真係乜都佢講晒啦。
今屆立法會由一二年十月組成至今，最少發生過十二次流會，而最近行政會議公布議員薪俸同醫療津貼維持不變，呢班「尊貴」議員嘅人工同表現真係完全不成正比，應該減人工至啱。
卓妮