中環出更：抗衰老專家 余啟宸籲補魚油
香港人夠晒長壽，但要有健康身體才能活得精彩。國際華商協進會（華商會）早前舉行晚宴，請來國際抗衰老專家兼海宸生物科技創辦人余啟宸（Samuel）醫生分享健康貼士。喺美國行醫逾三十年嘅Samuel話，港人食嘢經常多肉少菜，容易造成細胞慢性發炎，而慢性發炎正是百病根源。所以如果大家想活得長壽又健康，謹記食多啲蔬果及做運動之外，仲有一樣不可或缺嘅保健補充劑，就係魚油喇！
Samuel解釋話，衰老經常伴隨着輕度慢性發炎，科學家稱此現象為炎症，常見於老年人身上，而DHA、EPA、奧米加（Omega）三及九，則有助於減低慢性發炎。咁直接食魚可否取代魚油呢？Samuel就話，白色魚肉嘅魚油好少，要食黃色魚肉，例如吞拿魚及三文魚。
同窗戴澤良：命長更需健康
台下一眾賓客都聽得津津有味，包括台北經濟文化辦事處處長嚴重光、遠東貿易中心主任陳愛蘭、深圳海石集團副總裁朱清石及身兼Samuel拍檔嘅華商會理事鍾海燕等人，華商會會長羅台秦就踴躍提問。同Samuel係拔萃男書院同學嘅中華廠商聯合會（廠商會）副會長戴澤良有感而發話，命長更需健康，否則就「誤己誤人」喇。
同場仲有做電鍍環保業嘅廠商會會董吳國安，佢呻話現時生意已經好難做，加上內地嚴苛嘅勞動法令投資者掣肘多多，趕走唔少廠商，最近就有喺內地設廠嘅台資環保業回流台灣，情況值得關注。
卓妮