政情：民主思路「跑」出體育政策

一個智庫要倡議政策，都要諗啲辦法增加說服力，好多時都會搵一啲特別人士撐場。政團民主思路為咗推銷體育政策，搵嚟多項長跑紀錄保持者陳家豪一齊向傳媒簡介，運動員幫手講解體育政策，認真新鮮！

民主思路成立政策實驗室，一直都被問到會點樣運作，今次就係一個例子，實驗室嘅港島及九龍召集人、前香港乙組籃球運動員黃梓謙（Gary）話，佢負責撰寫體育政策，撰寫前特登搵咗陳家豪了解本港嘅體育政策問題，例如場地不足及精英運動員發展嘅困難等。

Gary話，收集運動員嘅意見後，民主思路預計四月中就會約見民政事務局等政府部門討論體育政策，不過陳家豪就唔會一齊去喇，因為運動員都要專注練習嘛！佢哋希望做到個平台，令到冇乜機會接觸政策局嘅持份者，意見都能夠畀政府知道。唔知佢哋下次講婦女政策嘅時候，會唔會搵媽媽級嘅嚟講解呢？