想喺競爭激烈嘅模特兒界闖出名堂，單憑靚樣同身材並唔足以突圍而出，仲要識得包裝同宣傳自己。黛蓓琪深明箇中道理，好識得爭取曝光率，喺電視同網絡節目中頻頻亮相，配合亮麗外形，令人對佢一見難忘。
今年22歲嚟自哈爾濱嘅黛蓓琪，擁有四分之一俄羅斯血統，五官標致迷人，身材高挑，魅力非凡，難怪喺2009年參加「世界最佳模特兒大賽中國賽區」獲得時尚魅力大獎，翌年佢入選「中國內衣模特大賽」十佳模特兒。如此優秀成績不但充分證明佢嘅外形同氣質幾咁出眾，而且實力超班。
憑住出眾嘅先天條件，令佢喺模特兒界嘅名聲直線上升，成為一位極具人氣嘅內衣模特兒，經常為各大內衣品牌行騷及出席宣傳活動，及後佢又以車模身份，喺北京、江蘇、南京、蘭州、西安等車展中亮相，此外，喺唔少嘅時裝展中見到佢走上天橋，除咗各種商業表演外，佢為多本潮流、內衣、男士等雜誌拍攝照片。不過講到最令男士們雀躍嘅，當然係佢嘅性感寫真集，先後推出過多本作品，有時以性感女神形象登場，有時又會以可愛兔女郎Look示人，配合玲瓏浮凸嘅火辣身材，睇到人流晒口水。
畢業於北京服裝設計學院嘅黛蓓琪，一直都冇放棄成為時裝設計師嘅夢想，喺2009年參加泳裝設計大賽，同年出席中國國際時裝周嘅時裝發布會，翌年又參加皮草設計大賽，時至今日佢仍然繼續有參與時裝設計嘅工作。作為一位專業模特兒嘅佢，同時具有時裝設計同品味觸覺，呢種專長令佢嘅發展路，同一般嘅模特兒相比，變得更加廣闊同獨特。
當然，以模特兒作為第一工作身份嘅佢，為咗增加曝光率，積極參與電視演出，經常喺綜藝節目亮相。最近佢更參與電視劇嘅拍攝工作，憑住出色嘅演技，獲得一致讚賞，同時被多個娛樂網站爭相邀請做專訪，人氣一時無兩。雖然阿妹嘅成績有目共睹，但佢對自己嘅要求愈嚟愈高，同時為保持人氣亦不遺餘力，經常喺微博同粉絲進行互動，更發放超性感嘅福利，早前佢就上載一張裸露玉背嘅照片，並以挑逗性嘅留言激發粉絲無比嘅遐想，試問叫人點可能唔愛上佢呢？
簡介：黛蓓琪外形迷人，加上噴血火辣嘅身材，每次佢上載性感相片，都會引起一番熱議。而呢位性感女神，即使工作幾忙碌，仍然會抽時間同粉絲互動，相當貼心呀！
網址：www.weibo.com/u/5507832896?is_hot=1
出生地：哈爾濱
身高：178cm
三圍：36、25、36
撰文：魂