近年來，基建工程延誤超支成為家常便飯，市民早就見怪不怪，估唔到家陣連供養假難民嘅開支亦一超再超，直情好似無底深潭咁，問你怕未！
呢，九龍城區議會尋日開會討論假難民問題，根據入境處最新數字，處理免遣返聲請嘅開支逐年增加，由一○/一一財政年度嘅二億八千多萬元增至上個財政年度嘅五億四千萬元，而今個財政年度嘅最新修訂預算係七點四五億元，比原預算足足超支一億元。
咁都未算吖，當局預計一六/一七年度假難民開支進一步上升至超過十一億元。唔好唔記得，港府中門大開，來者不拒，假難民短短五年間由幾百人增至近四千人，照咁睇，下一年度嘅預算開支分分鐘唔止呢條數，即使港府擁有金山銀山，亦遲早坐食山崩嘅咋。
假難民嚟到香港，衣食住行甚至打官司通通由公帑埋單，納稅人簡直冤過竇娥。最離譜嘅係，由於司法機構包庇放縱，假難民隨時可以成為「土豪」，連打黑工都慳番。呢，試過有南亞漢提出酷刑聲請後控告入境處「非法」拘押，最終竟獲法官裁定勝訴，入境處要向假難民賠償一萬元「人身自由損失」；另一單畸士更加匪夷所思，一名南亞人蛇提出酷刑聲請並獲發行街紙後，竟對扣留三個月期間嘅生活待遇作出投訴並提出訴訟，結果又係獲判勝訴，港府須賠償該名南亞人蛇二十一萬元，你話呢個究竟係咩世界吖？
善財難捨，冤枉甘心，港府寧願花大量金錢喺假難民身上，都唔肯照顧本港基層市民，連全民退休保障都推卸責任，簡直係手指拗出唔拗入。難為香港號稱富裕社會，竟然有咁多基層長者臨老唔過得世，有啲甚至要執紙皮維生，港產管僚究竟知唔知個「醜」字點寫o架！
當然喇，假難民問題尾大不掉，財政負擔沉重仲係其次，淪為治安毒瘤先係大問題。除咗被本地黑幫招攬從事各種非法勾當，假難民喺社區橫行霸道，無惡不作，更搞到香港陸沉咁滯。好似重災區元朗咁吖，非華裔居民有成四萬咁多，其中近四分之一持行街紙。呢班南亞兵團非禮、搶劫、打人、盜竊以至藏毒樣樣齊，罪案幾乎無日無之，導致人心惶惶，有市民提議召集壯男組織自衞隊，都咪話唔悲哀。再咁落去，香港遲早回到清末，市民要辦團練自保都似。
北大人話喎，香港發展要靠自己努力。弊在呢個政府無知無覺、麻木不仁，莫講話帶領香港發展，連保障市民生命安全都做唔到，簡直仲衰過腐敗無能嘅滿清政府。信佢一成，雙目失明，與其旨意港府，不如自求多福好過！