公民講場：監警會鬧劇 明招聘暗逼走

監警會去年底決定公開招聘秘書長一職，而自成為法定機構後擔任首位秘書長嘅朱敏健亦決定明年一月二日約滿後不再續約，有傳係佢同監警會主席郭琳廣鬧不和。郭琳廣同朱敏健尋日現身解畫，郭琳廣否認同朱敏健存有芥蒂，強調合作良好，佢亦有挽留，並鼓勵朱參加公開招聘。雖然朱敏健話純粹基於個人決定約滿離任，亦無受到政治壓力，但佢就話上次續任並無公開招聘，只係問佢有無興趣續約，當時佢亦一口答應。咁講法，公開招聘即係暗示叫朱敏健自己醒目執包袱啦，試問朱敏健會唔會抓爛塊面去應徵，然後等監警會拒絕聘用奚落呢？