政情：一坐就13年「騰雞」終別民政署
人稱「騰雞美華」嘅民政事務總署署長陳甘美華（陳甘）退休，結束近十三年嘅署長生涯，政府尋日宣布食物及衞生局副秘書長（衞生）謝小華於下月十一日接任。政界對於陳甘離任不表意外，事關陳甘今年年屆六十歲，早於○三年六月開始任民政事務總署署長，如按照政務官逢三、四年調任一次，陳甘一早夠鐘調走，點知三年又三年，陳甘仍然於署長原職留任長達十三年，相信係「前無古人，後無來者」喇。
接班人料忙「打交道」
下月履新民政事務總署署長嘅謝小華於政府服務近三十年，於一三年四月晉升為首長級乙一級政務官，先後於多個政策局及部門服務，包括運輸及房屋局副秘書長（運輸）、食衞局電子健康紀錄統籌處處長等。外界估計謝小華上任後要盡快同全港十八區區議會「打交道」，並跟進十八區區議會一億元社區重點項目計劃，避免出現任何超支或項目「爛尾」事件。